Welkom bij subcategorie "Gastauteur": Janine Janssen


Ode aan Dieteren

Wone in Deetere, ónger de rouk van Ech
d.w.z. weer wille hie noajt miè weg.
Want kiek óm uch haer, weer zeen toch zoa riek
Es geer noadenk gaef geer mich geliek:
Weer höbbe ein kirk mit eine eige pesjtoar
Weer höbbe ’n kenjer-, ’n dames- en ’n hièrekoar
Weer höbbe ’n museum en ’n Juf zonder kop
Weer höbbe eine drumband en fanfare die speelt in de top.
Weer höbbe eine berg, al is ter mer klein
Hie in de omtrek höbbe se gein.
Weer höbbe ein gemeinschapshoes en auch eine bekker
Weer kenne ós nog eine drenke en aete lekker!
Weer höbbe meistal waal zuuvere lóch
en gratis parkere, wo vunsjte det nog?
En neet te vergaete, oos sjutterie,
die brach joare trök ’t OLS tot hië.
Weer höbbe sjoon maedjes: om te zoene
en auch nog judokampioene.
Weer höbbe eine vesviever en ’n maneesj,
En in de Vleutstraot lik ’t basiskoleesj.
Weer höbbe ’n supermarkt én René, o zo!!
Ederein kent 'm in de hièle regio.
De Lollige Buk die zeen auch neet mis,
Die zörge det Deetere drie daag “knetter”is.
Saamhürigheid laef in Deetere hièl sjterk
Denk mer ens aan al det buurtvereinigingewerk.
Kenjervakantiewerk vreug völ energie
Mer doa is gein gebrek aan, det höbbe ze hie.
Ich ben vas get vergaete, ich hoap det geer mich vergaef
Noe wet geer tenminste woorum ich zo gaer in Deetere laef!!

Door: Janine Janssen (spelling aangepast door redactie)


De aw pómp

Links: koolmees gaat naar binnen.  Rechts: koolmees komt de pomp uit.

Bie ós op ’t good, dao stuit veur de seer.
’n awwerwetse pómp die duit ’t neet meer.
Mer èns, taege de aovend, dao zoog ich ‘m kómme
’n mees haw de pómp in ,,bezit" genómme.
Ich ging veur de aardigheid èns drop lètte,
dao koos ze de klok geliek op zètte !
Zo gaw es de zon woor óngergegaon.
Koom d’r nao ,,hoes" óm sjlaope te gaon.

Mer toen woort ’t veurjaor, wat haw d’r ’t drök.
Hae zóg zich ’n vruike en haw auch gelök.
En toen dach ich: noe bruk mich de klómp.
Ze boewe ein nèske bie ós in de pómp.
Ze sleipde mit tekskes, mit mós en mit veerkes.
Wat wirkde ze hel die ieverigge deerkes.
Soms dach ich waal èns, noe zeen ze weg
Has se gedach: ,,Mevrouw is aan de leg"

Ich koos ze good heuëre es ze kome vore,
die meze-sjnake zeen hieël snel groat gewore.
En op ‘nne Zondigmörge in Mei, de keukedeur stóng aope,
Kome ze veurzichtig d’r oet gekraope…..
Mer toen woort ’t stil op ’t good, ich höb ze gemis.
En wach weer mit spanning es ’t veurjaor is.
Geer kent mich geluive ’t is ’n waor gebeurd verhaol.
Ich höb ’t opgesjreve veur uch allemaol.

Door: Janine Janssen






Heeft u ook documentatie welke geschikt is om op te nemen op deze pagina
neem dan contact met mij op.

Heeft U een suggestie of opmerking, mail naar info@deetere.nl